Vawiin dt. 19.03.2026 hian Mizoram Electricity Regulatory Commission (MZERC) huaihawtin Mizoram State Advisory Committee meeting vawi 28-na chu Aijal Club-ah Er. Benjamin L.Tlumtea, Chairperson, MZERC kaihhruaina hnuaia neih a ni. He meeting-ah hian Power & Electricity Department-in mipuite hnena eng tha tak a pek theih dan tur te, consumer te hmakhaw ngai taka power supply chungchanga lungawi lohna rang zawka a chin felsak dan tur te ngaihtuah a ni a. AMC area leh AMC area pawn lama fel fai zawka Street light enkawl dan tur te, Smart Metering hna thawh mek chungchang te ngaihtuah a ni. Heng bakah hian kum thara P&E Deptt.-in power supply enkawl nana revenue sum mamawh, sawrkar subsidy leh eng chhit man (tariff) hmanga hmuh let a tum dan te thlir ho a ni bawk. P&E Deptt.-in kum 2026-27 atana Electricity tariff hman an dilna hi Commission-in naktuk dt. 20.03.2026 hian ngaihthlakna (Public Hearing) a nei dawn tih a sawi a. Public Hearing-ah hian P&E Deptt.-in kum thar 2026-27 atana tariff an rawtna chungchanga Commission-in mipui atanga rawtna leh sawiselna a dawn te leh P&E Deptt.-in a chhanna te ngaihthlak a ni ang.

He State Advisory Committee hi Section 87, Electricity Act, 2003-in a sawi anga, State Electricity Regulatory Commission thurawn petu tur atana din niin heng- Commerce, Industry, transport, agriculture, labour, consumers, non-governmental organizations leh electric lam kaihhnawiha academic and research bodies hrang hrang atanga mithiamte member atan ruat thin an ni.