Vawiin dt. 20.03.2026 hian Power & Electricity Department (P&ED)-in FY 2026-27 atana eng chhit man (Electricity tariff) a rawtna chungchangah Mizoram Electricity Regulatory Commission (MZERC)-in Public Hearing a nei a. Public Hearing-ah hian hun bituk chhunga rawtna leh sawiselna thu thlen leh P&ED-in an chhanna te ngaihthlak a ni. 

Public Hearing hi MZERC Chairperson, Pu Benjamin L.Tlumtea kaihhruaina-in Aijal Club-ah neih a ni a. Public Hearing neih tur hi chanchinbu-ah te chhuah a lo ni tawh a ni.

Multi-Year Tariff Regulations, 2014-in a phut angin P&ED hian kum tinin mipui hnena Power supply enkawl nana sum leh pai a mamawh (Aggregate Revenue Requirement) leh eng chhit man bithliah a rawtna chu Commission-ah a theh lut thin a. A rawtna hi newspaper-ah chhuahin mipui vantlang (consumers leh stakeholders)-ah sawiselna emaw, thurawn pe duh tan emaw hun hawn thin a ni. Sawiselna/thurawn pe duh chuan MZERC hnenah ziakin (Affidavit hmangin) an thehlut thin a ni. 

Kum kal mek FY 2025-2026 leh kum hmasa FY 2024-25 -ah te khan eng chhit man hi tihsan a lo ni tawh lova, tuna P&ED-in rawtna a thehluhah pawh hian eng chhit man tihsan rawt a ni lova, mipui atanga Revenue sum mamawh zat (ARR) a hmuh tlin lohna hi Sawrkarin subsidy-in a peksak dawn a ni. MZERC chuan ngun taka a zir chian hnu-ah kum thar FY 2026-27 atana Sawrkar pek tur subsidy leh eng chhit man hi a bithliah dawn a ni.